"Letu penzionerski dani" zbir je sličica iz desetogodišnjeg, svakodnevnog druženja jednog splitskoga penzionera i njegove klape, u najlipjen gradu na baloti zemaljskoj.
Štioci će lako uočit da penzionerima letu dani brže nego drugima; od ujutro kad obajdu Pazar i peškariju, priko obavezne kavice i ćakule, popodnevnog đira uz more, do mrkle noći kad se, poza večere, penšjunat raskomodi i zavali u poltronu, u želji da gleda televiziju. Kako su želje jedno, a godine drugo, on brzo zadrimje i priskoči program, kakvi bija da bija.
Puno toga ima o prijateljstvu, tradiciji, jubavi, viri i neviri, o prošlosti i sadašnjosti, grubome i lipome vrimenu, recesiji, spizi, duvanu, zdravju, sprovodima i partenci u vičnost, ali će se nać i nikoliko istinitih storija. Pratimo naše hodočasnike u najveća evropska svetišta, di gredu milijuni svita, koji skrušeno molu, svjesni svoje nemoći, prid Božjon svemoći.
Nać će se sto pedeset živih i mrtvih judi, od športskog fanatika Miška Rade i fra Luke Prcele do glumca Ive Marjanovića i neponovljivog barba Luke Kaliterne.
Za žive će Aleksa reć: „Bog in da zdravje još puno godin", a za mrtve: ,,Oli san ja kriv ča se nisu držali regule, koje se držin ja: „Ča se manje mičeš, manje se trošiš, višje ćeš živit!"